DƏHŞƏTLİ QƏZADA BİR AİLƏNİN 2 ÜZVÜ ÖLDÜ

 Dəhşətli yol qəzası Bakı-Qazax magistral yolunun 144-cü kilometrliyində, Hacıqabul rayonunun Qarasu kəndi ərazisində qeydə alınıb. Belə ki, Sabirabad rayonunun Kovlar kənd sakini,  Əliabbas Hasil oğlu Rəsulovun idarə etdiyi “Vaz-2106” markalı avtomobil dönmə əməliyyatı yerinə yetirərkən Ağstafa sakini, Tural Əmrahovun idarə etdiyi “Mersedess” markalı iri tutumlu sərnişin avtobusu ilə toqquşub. Nəticədə "Jiquli" markalı minik maşını 2 hissəyə parçalanıb. Qəza zamanı "Vaz-2106"nın sürücüsü hadisə yerindəcə keçinib. Maşında olan sürücünün doğmaları 53 yaşlı Sara Rəsulova, 6 aylıq körpə Fehruz Rəsulov, 4 yaşlı Əli Həmzəyev, 31 yaşlı Xeyranisə Həmzəyeva müxtəlif dərəcəli ağır bədən xəsarələri alıb. Yaralılar dərhal Şirvan şəhər mərkəzi xəstəxanasına çatdırılıb. Xəstəxanada yaralılara həkimlər tərəfindən ilk tibbi yardım göstərilməsinə baxmayaraq 6 aylıq körpənin həyatını xilas etmək mümkün olmayıb. O, reanimasiya şöbəsində dünyasını dəyişib. Hadisənin baş verməsinin ilkin səbəbi kimi minik avtomobilin dönmə əməliyyatını düzgün yerinə yetirməməsi və sərnişin avtobusunun böyük sürətlə hərəkətdə olması göstərilir.  

Z Faktla bağlı Baş Dövlət Yol Polisi İdarəsinin istintaq və təhqiqat şöbəsində cinayət işi açılıb,  araşdırma aparılır.